«ساغ یاندا- او اوزاقدا- بیر آدا وار،» ویتنی دئدی، «آزاجیق گیزه بورونموش-».
«نه آداسی؟» رئینسفورد سوردو.
«قدیم خریطه‌لرده گمی‌توزاغی یازیلیب،» ویتنی جواب وئردی، «آنلام‌وئریجی آد، اؤیله دئییلمی؟ گمیچی‌لرین او آدایا عجایب قورخولاری وار. ندنین بیلمیرم. بعضی خرافه‌لر-»
«گؤرمک اولمور،» رئینسفورد وورغولادی، شئهلی اوستوایی گئجه‌نین ایچیندن بیر شئییی سئچمه‌یه چالیشارکن. گئجه‌نین آغیر و ایستی قارانلیغی‌نی گمی‌نین اوستونده دویماق اولوردو.
«سنین ایشیقلی گوزلرین وار.» ویتنی دئدی. گولرکن، «گورموشم دورت یوز یارددان پاییزدا رنگی سولموش بوتالارین ایچیندن گئچن گوزنی ووروب سالاسان یئره، آمما سن ده آی‌سیز کارائیب گئجه‌لرین اورتاسیندان قیرخ یارد بیله گورنمزسن.»
«دورت یارد دا یوخ» رئینسفورد اعتیراف ائیله‌دی. «اوه، بو بیر شئهلی قره مخمله بنزیر.»
«ریودا ایشیقلاناجاقمیش» ویتنی سؤز وئردی. «نئچه گونون ایچینده ایشی گؤرمه‌لیییک. اوماریم جَگوار توفنگ‌لری پورد‌ئیه یئتیشمیش اولا. آمازوندا یاخجی اووچولوغوموز اولمالی. اولو ایدمان، اووچولوق.»
«دونیانین ان یاخجی ایدمانی» رئینسفورد اکله‌دی.
«اووچویا،» سؤزون دوزتدی ویتنی «جگوارا یوخ».
«سارساقلاما ویتنی» رئینسفورد دئدی، «سن بؤیوک-اویون اووچوسوسان، فیلسوف دئییلسن‌کی، کیم جگوارین نئجه حیس ائتمه‌سینه اؤنم وئریر؟»
«محتملن جگوار اؤزو» ویتنی آرتیردی.
ریچارد کانل
چئویرمن: حامد لطفی
سؤزلوک: آدا: جزیره؛ گیز: سرّ؛ توزاق: تله؛
