نصوح توبه‌سی

مولانا حیکایه‌لری: 1 نصوح توبه‌سی

ايل‌لر اؤنجه نَصوح آديندا بير آدام وار ایدي. نصوح حامام‌لاردا دلّاکليق ائدر، بؤيله‌جه قادين‌لاري قولايليقلا اوولاياراق باشدان چيخاراردي. اوزو قادين اوزو کيمي توک‌سوز ایدی. ارکک‌ليیي‌ني بو اوزدن راحاتليقلا گيزله‌دردي. نصوح ايل‌لرجه دلّاکليق ائتدي، کيمسه اونون ارکک اولدوغونو بیلمه‌دی. چونکو اوزو قادين اوزو کیمی، سسي قادين سسي کیمی ایدي. چرشاب گئيیر اؤرتو تاخاردي، فقط شهوتي آزغين بير گنج ایدي. بو اوزدن پادشاهين قيزلاريني بيله حامامدا يوواردي.

آرادان زامان گئچينجه نصوح بو ايشدن پئشمان اولدو، تؤبه ائتدي فقط تؤبه‌سيني توتمادي. دفعه‌لرجه بؤيله اولدو. بير گون نصوح بير آللاه دوستونا گئده‌رک:  «منه دوعا ائت.» دئیه ایسته‌دی. او آللاه‌ينج.ج. وَلي قولو اونا دوعا ائتدي.

نصوح بير گون يئنه حامامدا تاسي دولدورورکن، پادشاهين قيزي‌نين کوپه‌سينده‌کي اينجي‌لردن بيري ایتدی. بوتون قادين‌لار اونو آخدارماغا مامور اولدولار. هرکسين اشياسي‌ني آخدارما ايچين اؤنجه حامامين قاپي‌سي‌ني باغلادیلار. سونرا باشلاديلار آخدارمایا. فقط اينجي هئچ شکیلده تاپیلمادی. بونون اوزَرينه هرکسين آغزي‌ني و هر يئري‌ني آخدارمایا باشلاديلار.

«هرکس آنادان دوغما سويونسون.» دئیه باغيرديلار.  نصوح قورخوسوندان بير کنارا چکيلدي، اوزو قورخودان سارالميش دوداق‌لاري تيتريردی. اؤلوم قورخوسو هر ياني سارميش ایدي. اؤز اؤزونه: «يا ربّی، بيرچوخ دفعه‌لر تؤبه ائتديم فقط تؤبه‌می بير تهر توتماديم. اگر مني بو بلادان، رذیللیکدن و روسوایلیقدان قورتارسان بوتون ائتدیکلریمدن تؤبه ائتديم.» دئدي.

حامامداکي‌لار هر کسي آراديقدان سونرا: «ائي نصوح هر کسي آخداردیق؛ ایندی سيرا سنده دیر، گل سني ده آخداراق.» دئديلر. نصوح ايچين قورتولوش يوخ، اونون سیراسی یئتیشدیکده بیردن: «اينجي تاپیلدی.» دئيه بير سس گلدي. نصوح‌‍ی آخدارماقدان واز گئچديلر، بؤيله‌جه نصوح رذیل اولماقدان، اؤلومدن قورتولموش دور. اينجي بولوندوغو ايچين هرکس بايرام ائدير سئوينيردی. بو سئوينج دالغاسي گئچديکدن سونرا نصوح‌‍ی چاغيرديلار: «ائي گؤزل دلّاک گل، پادشاهين قيزي سني چاغيرير گل اونو یوووندور» دئديلر. نصوح بونو رد ائده‌رک حامامدان چيخيب گئتدي. بير داها دا تؤبه‌سيني بوزمادی…

کؤچورمن: حامد لطفی


سؤزلوک: قولای: راحات؛ اوولاماق: شکار ائتمک؛ آزغین: گمراه؛ بیله: حتی (بئله: اینچنین)؛ ج.ج.: جلّ جلاله؛ قول: بنده، عبد (/غول)؛  اینجی: دُر، گوهر، مورواری؛ آراماق: آخدارماق؛ بولماق: تاپماق؛ دالغا: موج؛ بوزماق: مخدوش ائتمک، سیندیرماق، محو ائتمک

Leave a Reply

Your email address will not be published. Required fields are marked *