هوندور قورباغا توکیونو قورتاریر

هوندور قورباغا توکیونو قورتاریر اؤیکوسونون اجزاسی

پلات[1]

15 فئبریه 1995ده، کاتاگیری، توکیوداکی بانک‌لاردان بیری‌نین اؤده‌نیلمه‌میش وام‌لار پئشینده اولان مامورو، آپارتمانینا گیردیکده هوندور بیر قورباغایلا راستلاشیر. قورباغا ادب-نزاکتله کاتاگیری‌نی گودمکده دیر، و کاتاگیری بو اولایی بیر اله-سالما کیمی حئساب ائدیر. هوندور قورباغا کاتاگیریدن عوذر دیله‌یه‌رک، اوتاقدا اونلار ایکی‌سیندن باشقا کیمسه اولمادی‌سینی سؤز وئریب، و بیر ضرورت اوزَره کاتاگیری‌نین ائوینه ایذن‌سیز گیرمه‌سینی سؤیله‌ییر. اونجا توکیونو بیر مصیبت داغیتماقدا دیر. شاشغینلیقدان دونوخموش کاتاگیری قورباغانین گرچک اولوب اولمادی‌سینی ریجا ائدیر، و قورباغا دووارلاری تیتره‌دن سسله قورولداماغا باشلاییر. قورباغا دئییر اوچ گون سونرا کوبه‌نی داغیدان دئپریمدن داها سرت بیر بؤیوک سیلکنتی توکیونو سیلکه‌له‌یه‌جک و 150.000دن آرتیق اینسان اؤلوب شهرین آلت‌یاپی‌سی بوتونلوکله داغیلاجاق. او دئییر، دئپریمین کانونو کاتاگیری چالیشان بانکین آلتیندا دیر و اونلار سیلکنتی باش وئرمه‌سین دئیه یئر آلتینا گئدیب قوردلا اؤلوم ساواشینا گیرمه‌لی دیرلر.

قورباغا آچیقلاییر، قورد چوخ هوندور بیر قورد دور و اون ایل‌لر دیر توکیونون آلتیندا یاتیب دیر. قورد اینجه سیلکنتی‌لری سوروب گیزلی بیر شیمیایی سورجله قیزغینلیغا چئویریر. قیزغینلیغی بیر دوزَجدن اوسته گئدندن سونرا اونو سیلکنتی کیمی بوشالدیر. قورباغا آرتیریر، قوردلا اونون آراسیندا شخصی بیر دوشمانلیق یوخ دور. کاتاگیری بو احوالاتی و سؤیلنتی‌لری اینانسا دا، آنجاق اونون الیندن نه گله‌بیلری دوشونور.

قورباغا کاتاگیری‌نی بیر اوزون مدت ایچین گؤزده ساخلاماسی‌نی وورغولاییر. او کاتاگیری‌نین نئجه چیرکین محلّه‌لرده دارغاشاییردلار و بوینو یوغون‌لاردان حئساب ییغمایا گئتدی‌سینی گؤروب و اونون بو چالیشمالار قیبالیندا یاراشیقلی هئچ بیر قارشیلامایالا اؤزلشمه‌مه‌سینه تانیق اولوب. بیر ده، قورباغا اونون نئجه باجی‌قارداش‌لاریلا اؤز-وئرییله داوراندی‌سی‌نین گؤردوسونو ده سؤیله‌ییر. قورباغا اعتیراف ائدیر، توکیودا اوندان باشقاسینی بو ساواشدا اؤز یانیجا آپارمایا تاپابیلمه‌یه‌جک. کاتاگیری اؤنه‌ریر، گوجلو بیری‌سی، بلکه ساواش قایدالاری خوجاسی کیمی بیری‌سینی ساواشا آپارماق قورباغایا داها اییی اولار. قورباغا باشی‌نی توولاییب، دئیر اؤزو ساواشی تک باشینا آپارمالی دیر آنجاق معنوی حیمایه‌یه احتیاجی وار. قورباغا دا قوردلا ساواشمایا ایکی کؤنوللو و قورخوموش کیمی دیر، آمّا نیچه‌دن بیر آلینتی سؤیله‌ییر: «ان یوکسک دوشونوش قورخمامازلیق دیر.»

بویولو گرچکچیلیک[2] و گرچکلیک  سورغوسو

بویولو گرچکچیلیک سورئال و فانتاستیکال اجزانی طبیعی و گرچک سئتینگده یئرلشدیرن ادبی ژانر دئمک دیر. بو فرقلی ائلئمنت‌لر اغلب راحاتجا بیر-بیریله یول گلیرلر و کاراکتر بو فانتئزی سیرادیشی اولای‌لاری گونده‌لیک یاشامین بیر پارچاسی اولاراق منیمسه‌ییر. گاهدان دا فانتئزی، گرچک دونیانی شاشیردیب بو گرگینلیک ناغیلی اؤنه آپاران گوجه چئویریلیر.

«هوندور قورباغا توکیونو قورتاریر» اؤیکوسونده، بویو (جادو) توخدادیجی رولو ایله قوللوق ائتمکده دیر. قورباغانین سؤزونه اینانساقسا_کی بیر یاخین بلا توکیونو تهدید ائدیر_ قورباغا (بویو تمثیلچی‌سی) قوردون آرادان قالدیرماسیلا توکیونو سایکیک (روانی) سورون‌لاردان قورتارمایا چیخیش ائدیر؛ یوخسا بونو اینانماساق، و بونلارین هامی‌سی کاتاگیری‌نین بئینینده دیر دئسکسه، یئنه ده بویو بیر قورتاریجی و توخدادیجی رولوندا دیر.

یازی‌نین باشا-باشیندا، کاتاگیری یاشام تجروبه‌لری‌نین گرچک اولوب اولمادی‌سی‌نین اونایلاماسیندا چتینلیک چکه‌رک، حیس‌لرینه نئجه گووه‌نیب اطرفدا اولای‌لاری سال چیخ ائدیر. طبیعتینده فلسفی موضونو داشییان اؤیکوده گئدن ائپیستیمولوژی قونوسو، کاتاگیری‌نین قورباغا، قورد و یاخین مصیبتدن آلدیغی آلغی اؤیکو دونیاسی‌نی قورور.

 فیزیکی اولان و فکت‌لره دایانان وارلیغی سؤزلوک‌لر گرچک‌ مدخلینه معنی ائدیرلرسه، آنجاق قورباغا بیر ماده‌دن اولوشان وارلیغی تجسم ائدرکن کاتاگیریدن باشقا کیمسه اونو گؤرمه‌دی‌سی چلیشکی یارادیر. بو اؤیکوده گرچکله خیال سینیری ایچ-ایچه دیر و کاتاگیری بو دونیالاری تمییز ائتمه‌یه چالیشدیقدا قورباغا بونلاری قاریشدیرماقدا بولونور.

کاراکترلر

کاتاگیری

ایلک باخیشدا، کاتاگیری‌ده تاپمایا ائله بیر زادلار یوخ دور. قیرخ‌لاریندا، توپلومجا ال-آیاق‌سیز، آیاغی‌نین آلتی صاف، و توک‌لری گئری چکیلمیش، بیر نئچه عائیله اعضاسی و اوندان دا آز یولداشی اولان بیری‌سی. گؤز توتمایان اوست-باشیندان یانا، هر حالدا، کاتاگیری حقیقتن دوشوندوروجو صیفت‌لره مالیک دیر. قورباغا اونون قاناجاقلیغینا و قورخمازلیغینا وورغون دور، آیریجا، چالیش‌لارلا اونون سس‌سیز آستا اوزلشمه‌سینی و اؤدول آردیندا اولمادی‌سینی دَیرلندیریر. کاتاگیری‌نین اینزیواسی محتملن اونون تواضعو مانیفستی کیمی آلینماقدا دیر، و اؤزونو دونیایا سوخماماق، یوخسا دونیادان آرتیغی‌نی بکله‌مه‌مک آرزی‌سیندا بولونماق قانیتی دیر. اونون بو صیفت‌لرینه گرکن بیر چوخ اوغوردان «یولداشلیق» بیری اولابیلن حالدا، کاتاگیری اوندان محروم دور.

قورباغا

قورباغا چلیشکی‌لرین قاریشیغی دیر. صنعتی و دوغانی سئون، باریشجیل اینجه اورکلی بیریسی، آنجاق زامانی گلمیشکن قوردون دایاندی‌سی پوزولوب توکیو شهری‌نی تهدید ائدنده، قورباغا اؤز گؤرَوی‌نی قوچاقلیقلا بوینونا آلیر. کاتاگیری‌له تام اینجه‌لیک و سایغیلا دانیشماسینا ترس، یئری گلدیکده دوشمن‌لرین و قوردون جانینا قورخو سالیر. قورباغا بیر ده، چوخ کیتاب-سئور دیر، و بوتون دانیشیق‌لاریندا بیلگین باتی دوشونورلریندن قایناق گتیریر، اؤزنک اولاراق او سیرادان: فلسفه‌ده فردریش نیچه و یازارلاردا جوزئف کونراد، لئو تولستوی‌و و فیودور داستایئفسکی‌نی سایماق اولار.

تئم‌لر

اؤزو پاداشی اولاراق اردم

«هوندور قورباغا توکیونو قورتاریر»ین تمل تئمی حایاتداکی گؤرَو و سوروملولوق دور. اؤیکوجه هر کسین یاشامیندا بیر سیرا گؤرَولر وار دیر و اونلارا بویون اَیمه‌لی دیر، حتی بیلینمه‌ییرسه ده، اؤدوللنمه‌ییرسه ده. کاتاگیری بوتون یاشامی‌نی بو گؤرَولرین یئرینه یئتیرمه‌سینه صرف ائدیب دیر. والیدئینی اؤلندن سونرا، اؤزونو باجی-قارداشی‌نین بؤیوتمه‌سینه وقف ائتمیش، اونلاری کالجه گؤندریب، ائولنمه‌لری‌نی دوزنله‌میش دیر. ایش آلانیندا ان آغیر مسئولیتین سوروملوسو اولاراق شهرین ان تهلوکه‌لی یئرلرینده خطرلی موشتری‌لردن حئساب اؤده‌مکله مشغول اولوب، چالیشمالارینا اویغون مَزایادان محروم قالیب دیر. قورباغا کاتاگیری‌نین حیاتی‌نی دَییشیر، اونداکی کاتاگیریه دوشوندورور اردم و فضیلتین اؤدولو ایله موکافاتی همن اردم و فضیلت اؤزو دور. کاتاگیری قوردلا ساواشمایا کونولسوز اولاندا، قورباغا بیر آنلاییشا ال آتیب دئییر: بو ساواش «گؤرَو و حیثیت قونوسو دور» موباهات یوخ.

(بوتون بؤلوم‌لر اؤیکونون بوتونلویو ایسپویل اولماسین دئیه تلخیص اولودو. مقاله‌نین بوتونونه آلت یازیداکی باغلانتیلا اولاشابیلرسینیز.)

قیسادیب چئویرن: حامد لطفی


[1] https://www.sparknotes.com

[2] Magical Realism /Büyülü Gərçəkçilik/

Leave a Reply

Your email address will not be published. Required fields are marked *